اعتکاف پر اٹھنے والے 3 کروڑ کے اخراجات بھی سیلاب زدگان کو
دیئے جائیں گے
اب تک منہاج ویلفیئر فاؤنڈیشن 3 کروڑ روپے متاثرین سیلاب پر خرچ کر چکی ہے
ڈاکٹر محمد طاہر القادری کا مجلس شوریٰ کے ہنگامی اجلاس سے لندن سے ویڈیو کانفرنس
کے ذریعے خطاب
شیخ الاسلام ڈاکٹر محمد طاہر القادری نے 20 سال سے لگاتار ہونے والے شہر اعتکاف
کو سیلاب زدگان کی مدد کے لیے اس سال منسوخ کرنے کا اعلان کیا ہے اور اعتکاف پر
تحریک کی طرف سے خرچ ہونے والے 3 کروڑ روپے بھی سیلاب زدگان پر خرچ کرنے کا اعلان
کیا ہے۔ انہوں نے آنے والے ہزاروں معتکفین کو متاثرین سیلاب کا خادم اور خدمتگار بن
کر رمضان کے دس اور عید کا دن بھی متاثرہ علاقوں میں گزارنے کا حکم دیا ہے۔ انہوں
نے کہا کہ تاریخ کی بدترین آفت کا شکار ہونے والوں کی مدد کرنے والوں کو کئی نفلی
اعتکافات کا ثواب ملے گا۔ وہ گذشتہ روز تحریک منہاج القرآن کی مجلس شوریٰ کے اجلاس
سے ویڈیو کانفرنس کے ذریعے سے لندن سے خطاب کررہے تھے۔ مجلس شوریٰ میں پورے ملک سے
دو ہزار سے زائد عہدیداران نے حصہ لیا۔ ڈاکٹر طاہر القادری نے کہا کہ اعتکاف کے لیے
آنے والے ہزاروں افراد سیلاب زدہ علاقوں کو نکل جائیں اور اعتکاف پر آنے والے
اخراجات کے علاوہ بھی مصیبت زدہ لوگو ں پر خرچ کریں۔ انہوں نے کہا کہ تحریک منہاج
القرآن کے رفقاء و وابستگان پوری دنیا میں عید کو سادگی سے منائیں اور نئے کپڑوں،
جوتوں، چوڑیوں اور دیگر لوازمات کو خود پر حرام کرلیں اور یہ رقم سیلاب زدگان کو
دیں جو یہ حکم نہیں مانے گا اس کا مجھ سے کوئی تعلق نہیں ہوگا۔ منہاج ویلفیئر
فاؤنڈیشن 20 ہزار خاندانوں کی کفالت کو اپنے ذمہ لے گی۔ انہوں نے کہا کہ اب تک 70
ٹرکوں پر 3 کروڑ مالیت کا سامان متاثرین سیلاب تک پہنچایا جا چکا ہے۔ کثیر تعداد
میں منہاج خیمہ بستیاں بسائی جائیں۔ انہوں نے کہا کہ 1000 بچوں کے لیے 40 کروڑ روپے
کی لاگت سے مکمل ہونے والے پروجیکٹ ’’آغوش‘‘ میں 500 بچے متاثرہ علاقوں سے لیے
جائیں گے اور ان کی مکمل کفالت اور تعلیم کی ذمہ داریاں لی جائیں گی۔ ڈاکٹر طاہر
القادری نے کہا کہ منہاج ایجوکیشن سوسائٹی کے 573 سکولز کے لاکھوں بچے اور عملہ بھی
اعتکاف کے 10 دن اور عید کا دن سیلاب زدہ لوگوں کی مدد کریں گے۔ سکولوں کو ریلیف
کیمپ میں بد ل دیا جائے اور تحریک سے وابستہ ڈاکٹرز اور پیرا میڈیکل سٹاف چھٹیاں لے
کر سیلاب زدہ علاقوں کو چلے جائیں۔ انہوں نے کہا کہ مخیر تحریکی احباب متاثرہ
علاقوں میں لنگر شروع کریں اور سیلاب زدگان کی مدد کے لیے کوئی دقیقہ فروگزاشت نہ
کیا جائے۔ انہوں نے عوام سے اپیل کی ہے کہ عید سادگی سے منائیں اور سیلاب زدگان کی
دل کھول کر مدد کریں۔
