تحریک منہاج القرآن کے سینئر رہنما سید ہدایت رسول شاہ قادری کو سپرد خاک کر دیا گیا

نماز جنازہ صدر منہاج القرآن انٹرنیشنل ڈاکٹر حسین محی الدین قادری نے پڑھائی
منہاج القرآن، عوامی تحریک کے رہنماؤں سمیت سیاسی، سماجی شخصیات کی شرکت
سید ہدایت رسول شاہ کی زندگی اشاعت علم اور فروغ عشق رسول ﷺمیں گزری:ڈاکٹر حسین محی الدین قادری

لاہور (22 دسمبر 2019) تحریک منہاج القرآن کے سینئر رہنما، معروف روحانی شخصیت کالج آف شریعہ اینڈ اسلامک سائنسز کے بانی فاضل صاحبزادہ سید ہدایت رسول شاہ قادری کو ہزاروں سوگواروں کی موجودگی میں سپرد خاک کر دیا گیا، ان کی نماز جنازہ صدر منہاج القرآن انٹرنیشنل ڈاکٹر حسین محی الدین قادری نے دھوبی گھاٹ گراؤنڈ فیصل آباد میں پڑھائی، مرحوم کی نماز جنازہ میں تحریک منہاج القرآن، پاکستان عوامی تحریک کے مرکزی، صوبائی، ضلعی رہنماؤں، کارکنان سمیت معزز علاقہ، سیاسی، سماجی شخصیات، علماء مشائخ اور عوام الناس نے بڑی تعداد میں شرکت کی۔

نماز جنازہ کے بعد گفتگو کرتے ہوئے صدر منہاج القرآن انٹرنیشنل ڈاکٹر حسین محی الدین قادری نے کہا کہ مرحوم اسلام، پاکستان اور تحریک منہاج القرآن کا اثاثہ تھے، سید ہدایت رسول شاہ نے تمام عمر پیار، محبت او بھائی چارے کا درس دیا۔ ان کی شخصیت کا اثر ہمیشہ دلوں پر قائم رہے گا۔ مرحوم سچے عاشق رسول ﷺ اور محبت وطن پاکستان تھے۔ انہوں نے کہا کہ مرحوم نے تصوف اور روحانیت کی اصل اقداروں کی بحالی کیلئے کردار ادا کیا، ہمیشہ بین المسالک ہم آہنگی کے حوالے سے متحرک رہے، سید ہدایت رسول شاہ قادری کی زندگی فروغ علم اور فروغ عشق رسول میں گزری۔ مرحوم بہترین خطیب اور شفیق استاد تھے۔ تحریک منہاج القرآن کے کارکنان اور علمی حلقے آج ایک قابل شخصیت سے محروم ہو گئے۔ مرحوم کی دینی، ملی اور سماجی خدمات کو ہمیشہ یاد رکھا جائیگا۔