نقطہ نظرکے احترام سے اتحادِ امت فروغ پائے گا: ڈاکٹر حسن محی الدین قادری کا جامعہ عروۃ الوثقیٰ میں ”وحدت امت و منہج رسالت کانفرنس“ سے خطاب
فقہ کے تمام امام علمی اختلاف کے باوجود ایک دوسرے کا احترام کرتے تھے
جامعہ عروۃ الوثقیٰ میں ”وحدت امت و منہج رسالت کانفرنس“ سے خطاب
شدت پسندی کو امن بقائے باہمی سے ختم کرنا ہوگا: چیئرمین سپریم کونسل منہاج القرآن
منہاج القرآن انٹرنیشنل کی سپریم کونسل کے چیئرمین ڈاکٹر حسن محی الدین قادری نے جامعہ عروۃ الوثقیٰ میں ”وحدت امت و منہج رسالت کانفرنس“ سے خطاب کرتے ہوئے کہاکہ امت کو آج اتحاد کی ضرورت ہے۔ تمام مسالک جدا جدا خوشبو والے خوشنما پھول ہیں۔ یہ پھول یکجا ہوں تو اسلام کا گلدستہ مکمل ہوتا ہے۔ نقطہ نظر کے احترام سے اتحاد امت فروغ پائے گا۔ اللہ اور اس کے رسول ﷺ کی اطاعت ہی صراط مستقیم ہے۔
جامعہ عروۃ الوثقیٰ پہنچنے پر سربراہ علامہ سید جواد حسین نقوی اور ان کے مرکزی قائدین نے چیئرمین سپریم کونسل کا پرتباک استقبال کیا۔ اس موقع پرجسٹس (ر) نذیر احمد غازی، علامہ سید ضیاء اللہ شاہ بخاری، ڈاکٹر جعفر روناس، علامہ شجاع الدین شیخ، علامہ رضوان عابدی، علامہ میر آصف اکبر، پروفیسر حافظ سعید رضا بغدادی، ڈاکٹر علی وقار قادری، جواد حامد، قاضی فیض الاسلام، چوہدری عرفان یوسف شریک تھے۔
چیئرمین سپریم کونسل نے مزید کہا کہ انتہاء پسندی اور تنگ نظری نے اسلامی تعلیمات اور اعتدال پر مبنی فکر کو نقصان پہنچایا۔ شدت پسندی اور تنگ نظری کو امن بقائے باہمی سے ختم کرنا ہوگا۔ فقہ کے تمام امام علمی اختلافات کے باوجود ایک دوسرے کے ساتھ ادب و احترام کا رشتہ رکھتے تھے۔ اختلاف رائے کا احترام کرنے سے ہم ایک حقیقی امت بن کر ابھریں گے۔
تبصرہ