جامع شیخ الاسلام ماڈل ٹاؤن لاہور میں تیسرے سالانہ جشنِ مولائے کائناتؑ کا انعقاد
جامع شیخ الاسلام ماڈل ٹاؤن لاہور میں غلامانِ اہلِ بیت کے زیرِاہتمام تیسرا سالانہ جشنِ مولائے کائنات حضرت علی کرم اللہ وجہہ الکریم نہایت عقیدت کے ساتھ منعقد ہوا۔ محفل میں عاشقانِ اہلِ بیت کی بڑی تعداد نے شرکت کی اور حضرت علیؑ کی شان و عظمت پر خراجِ عقیدت پیش کیا۔ محفل کا باقاعدہ آغاز تلاوتِ کلامِ ربانی سے ہوا جس کی سعادت فضیلۃ الشیخ قاری سید خالد حمید شاہ کاظمی نے حاصل کی۔
استقبالیہ خطاب میں صفدر علی محسن نے مولائے کائناتؑ کی عظمت و فضیلت کو اجاگر کرتے ہوئے کہا کہ “یا علی! انت اخی فی الدنیا و الآخرۃ، من کنت مولاہ فھذا علی مولاہ”، اور یہ کہ ایسی بابرکت محافل صرف خوش نصیبوں کو نصیب ہوتی ہیں۔ انہوں نے غلامانِ اہلِ بیت کی پوری ٹیم کو اس عظیم الشان محفل کے انعقاد پر مبارکباد پیش کی اور دعا کرتے ہوئے کہا کہ شیخ الاسلام ڈاکٹر محمد طاہر القادری دامت برکاتہم العالیہ کا سایہ اُمتِ مسلمہ پر تادیر قائم و دائم رہے اور تحریکِ منہاج القرآن کا پیغام پوری دنیا میں پھیلتا رہے۔
محفل میں محمد حسنین نقشبندی، محمد نوید نقیبی اور علی حسنین آصف نے نعتِ رسولِ مقبول ﷺ پیش کرنے کی سعادت حاصل کی، جبکہ گلگت بلتستان سے عابد نوری، حسن عبداللہ، راقب علی نوشاہی، غلام زین العابدین میثمی، حافظ یاسر علی گولڑوی اور شکیل احمد طاہر نے منقبتِ مولائے کائناتؑ پیش کیں۔ اس موقع پر علامہ غلام ربانی تیمور مرحوم کو خراجِ عقیدت پیش کیا گیا اور ان کی دینی خدمات کو سراہا گیا۔
محفل میں مولائے کائناتؑ حضرت علیؑ کے یومِ مناسبت سے کیک بھی کاٹا گیا۔ محفل کے اختتام پر سید ڈاکٹر مبشر حسین شاہ کاظمی نے ملک و ملت کی سلامتی اور بالخصوص علامہ غلام ربانی تیمور مرحوم کے ایصالِ ثواب کے لیے دعا کی گئی۔
جشنِ مولائے کائناتؑ میں نائب صدر منہاج القرآن انٹرنیشنل فرانس محمد اقبال مصطفوی، پروفیسر صابر حسین نقشبندی، صاحبزادہ حمزہ مصطفیٰ (فرزند غلام ربانی تیمور مرحوم)، وقار احمد ضیائی (مہتمم مدرسہ حسنین کریمین ایبٹ آباد)، نگران گوشۂ درود حاجی غلام فرید، علامہ افتخار احمد عباسی، اویس علی بھائی، حاجی محمد الیاس، مخدوم ڈاکٹر مبشر حسین کاظمی، نورالعین سعیدی، شریعہ کالج کے اساتذہ و طلبہ اور علاقہ بھر سے عاشقانِ اہلِ بیت کی کثیر تعداد نے شرکت کی۔
تبصرہ