شیطان کے پیروکار افراد معاشرے میں افرا تفری، انتشار، افتراق اور بے حیائی کو فروغ دیتے ہیں
صاحبزادہ حسین محی الدین القادری کا مرکزی سیکرٹریٹ میں منعقدہ ماہانہ مجلس ختم الصلوۃ علی النبی (ص) سے خطاب

اللہ ہر کام کو دیکھ رہا ہے اگر یہ عقیدہ پختہ ہو جائے تو انسان ظلم و بربریت کے کام ترک کر دے۔ ظلم، تشدد اور بربریت مسلمانو ں کی شان نہیں۔ حقیقی مسلمان امن، محبت اور احساس انسانیت کا پیکر ہوتا ہے۔ شیطان کے پیروکار افراد معاشرے میں افرا تفری، انتشار، افتراق اور بے حیائی کو فروغ دیتے ہیں۔ رحمان کے بندے معاشرے میں امن و محبت کے چراغ روشن کر دیتے ہیں۔ ان خیالات کا اظہار تحریک منہاج القرآن کے بانی و سرپرست اعلی شیخ الاسلام ڈاکٹر محمد طاہر القادری کے صاحبزادہ حسین محی الدین القادری نے تحریک منہاج القرآن شعبہ اجتماعات کے زیراہتمام مرکزی سیکرٹریٹ میں ہونے والے ماہانہ مجلس ختم الصلوۃ علی النبی صلی اللہ علیہ وآلہ وسلم میں خطاب کرتے ہوئے کیا۔ اس موقع پر قائم مقام ناظم اعلی شیخ زاہد فیاض، میاں عبدالقادر، رانا محمد ادریس قادری، پروفیسر محمد نواز ظفر، راجہ زاہد، سید مشرف شاہ، جواد حامد، حاجی سیلم، فیصل محمود طاہر، ساجد گوندل، علامہ غالب پرویز لاہوری، امجد حسین جٹ، بلال مصطفوی اور محمد لطیف مدنی بھی موجود تھے۔ مجلس میں ہزاروں مرد و خواتین نے شرکت کی۔ پوری دنیا میں تحریک منہاج القرآن کے زیر انتظام ماہ جنوری میں پڑھا جانے والا 34 کروڑ سے زائد درود و سلام حضور اکرم صلی اللہ علیہ وآلہ وسلم کی بارگاہ میں پیش کیا گیا۔ صاحبزادہ حسین محی الدین القادری نے کہا کہ جس بندے کی خلوت پاکیزہ ہو جائے تو جلوت میں اللہ اسے برکتوں سے نواز دیتا ہے۔ اللہ تعالی کا دوست اصل میں وہی ہوتا ہے جو اپنی جلوت اور خلوت کو پاکیزہ کر لیتا ہے۔ انہوں نے کہا کہ مسلمانوں کی عبادت کا نور ان کے چہروں پر چمکتا ہے اور اللہ تعالی انہیں ایک نورانی قوت عطا کرتا ہے۔ یہی نورانی قوت مرنے کے بعد قبر میں روشنی پھیلا دیتی ہے۔ جس سے جنت کی ٹھنڈی ہوائیں نصیب ہوتی ہیں۔ انہوں نے کہا کہ ہم دنیا سے چھپ کر گناہ کر سکتے ہیں مگر اللہ تعالی سے نہیں چھپ سکتے کیونکہ وہ ظاہر و باطن سے آشنا ہے۔ انہوں نے کہا کہ آخرت کو بھول جانے والا انسان گھاٹے میں ہے مگر جو آخرت کو یاد کرتا ہے اوراپنے اعمال کو درست کر لیتا ہے۔ اللہ تعالی اس کے اقوال اور احوال میں اپنی رحمت شامل کر دیتا ہے۔ صاحبزادہ حسین محی الدین القادری نے کہا کہ اللہ تعالی کی ذات پر پختہ یقین رکھنے والا فرد کبھی بھی دہشت گردی کی کاروائیوں میں ملوث نہیں ہو سکتا کیونکہ اللہ تعالی کی ذات پر پختہ یقین رکھنے والا اس کے ہر حکم کو مانتا ہے۔ اللہ تعالی کا حکم ہے کہ میری مخلوق سے محبت کرو میں تم سے محبت کرونگا تم میری مخلوق پر رحم کرو میں تم پر رحم کرونگا۔ تم میری مخلوق کی مدد کرو میں میں تمہاری مدد کرونگا۔ تم میرے بندوں کا خیال رکھو میں تمہارا خیال رکھونگا۔ تم دکھی انسانیت کے دکھ دور کرو میں تمہارے دکھ دور کرونگا۔ انہوں نے کہا کہ معاشر ے میں برائیاں، شیطان کے کارنامے ہیں جو ان میں شامل ہوتا ہے وہ صراطِ مستقیم سے بھٹک جاتا ہے۔ انہوں نے کہا کہ ذہنی، قلبی اور جسمانی بیماریاں بڑھ رہی ہیں کیونکہ ہم نے دین اسلام کو ترک کیا ہوا ہے۔ حسن نیت، حسن عبادت اور حسن عمل کے نور سے آج بھی ہم زندہ و تابندہ قوم بن سکتے ہیں۔ اگرغیروں کی غلامی کو ترک کر کے اللہ اور رسول اکر م صلی اللہ علیہ وآلہ وسلم کی غلامی میں زندگی بسر کرنے کا پختہ عزم کر لیں تو آج بھی ہم مضبوط قوم بن سکتے ہیں۔ آخر میں ملک و قوم کی سلامتی اور استحکام پاکستان کے لیے خصوصی دعا کی گی۔