بارسلونا اور سپین بھر کی سب سے بڑی میلاد النبی صلی اللہ علیہ وآلہ وسلم کانفرنس منہاج القرآن انٹرنیشنل سپین بارسلونا کے زیراہتمام 28 فروری بروز اتوار شام 4:30 پر Museu Maritim کے ہال میں منعقد ہو گی۔ پروگرام کو کامیاب بنانے کے لیے منہاج القرآن انٹرنیشنل سپین کی تمام ذیلی تنظیمات نے اپنی تیاریاں مکمل کر لی ہیں، بارسلونا سپین میں یہ 14ویں سالانہ میلاد النبی صلی اللہ علیہ وآلہ وسلم کانفرنس ہو گی۔ منہاج القرآن ناروے کے امیر علامہ صداقت علی قادری خصوصی خطاب کریں گے۔

پروگرام کے مطابق تلاوت قرآن کریم کے بعد منہاج القرآن بارسلونا کی منہاج یوتھ لیگ اور منہاج ویمن لیگ پر مشتمل منہاج نعت کونسل کے اراکین PTV اور ریڈیو پاکستان کے معروف نعت خوان قدیر احمد خان دف کے ساتھ آقائے دو جہاں صلی اللہ علیہ وآلہ وسلم کی بارگاہ میں گلہائے عقیدت پیش کریں گے۔

محفل میں پاکستانی کمیونٹی کے علاوہ مقامی ہسپانوی مسلم شخصیات اور مختلف کاروباری، مذھبی، سماجی و سیاسی تنظیمات کے نمائندگان بھی شرکت کریں گے۔ مہمان خصوصی پاکستانی قونصلر جنرل ایاز حسین سید ہونگے، ان کے علاوہ ویلفیئر قونصلر سید شکیل شاہ، صدر پاکستان فیڈریشن راجہ شعیب ستی اور دیگر بھی شرکت کریں گے۔

پروگرام میں قرعہ اندازی کے ذریعے 2 افراد کو عمرہ ٹکٹ بھی دیئے جائیں گے، تمام خواتین و حضرات کو شرکت کی دعوت عام ہے۔ اختتام پر لنگر میلاد (ضیافت میلاد) کا خصوصی انتظام ہو گا۔ تمام شرکاء سے گزارش ہے کہ وہ باوضو تشریف لائیں، وہ افراد جو بارسلونا سے باہر سے آئیں وہ MuseuMaritim پہنچنے کے لیے Metro لائن نمبر 3 کے اسٹاپ Drassanes پر اتریں، نقشہ پر مزید تفصیلات موجود ہیں۔