مانتے ہیں کہ ڈاکٹر طاہرالقادری نے کرپٹ نظام کے خلاف درست سمت میں جدوجہد کی: PTI پنجاب کے صدر کی PAT پنجاب کے رہنماؤں سے ملاقات

مورخہ: 26 جون 2013ء

جمہوریت اور کرپٹ نظام انتخاب میں کوئی جوڑ نہیں، پاکستان تحریک انصاف اور پاکستان عوامی تحریک میں اتفاق
انتخابی اصلاحات کے بغیر تبدیلی کا خواب شرمندہ تعبیر نہیں ہو سکتا
عوام کو جان لینا چاہیے کہ موجودہ ظالمانہ نظام کو موت دئیے بغیر انہیں نجات نہیں مل سکتی
وقت آ گیا ہے کہ تبدیلی کی قوتیں تحفظات کو بالائے طاق رکھتے ہوئے ایک راستہ چن لیں
پاکستان تحریک انصاف (پنجاب) کے صدر کی بشارت جسپال سے ماڈل ٹاؤن میں ملاقات

صدر پاکستان تحریک انصاف (پنجاب) محمد اعجاز چودھری کی قیادت میں 4 رکنی وفدنے پاکستان عوامی تحریک (پنجاب) کے صدر بشارت عزیز جسپال سے ماڈل ٹاؤن سیکرٹریٹ میں ملاقات کی۔ صدر پاکستان تحریک انصاف پنجاب نے ملاقات کے دوران کہا کہ ہم مانتے ہیں ڈاکٹر طاہرالقادری نے نظام کے خلاف درست سمت میں جدوجہد کی۔ موجودہ نظام انتخاب جمہوریت اور تبدیلی کا دشمن ہے اور انتخابی اصلاحات ناگزیر ہو چکیں ہیں۔ پاکستان تحریک انصاف اور پاکستان عوامی تحریک کی منزل تبدیلی ہے اور اس کے لئے ورکنگ ریلشن شپ کے عمل کو آگے بڑھایا جائے گا۔ انہوں نے کہا کہ ملاقاتوں کا سلسلہ جاری رہے گا، جبکہ میں پاکستان تحریک انصاف کی طرف سے پاکستان عوامی تحریک کی قیادت کو تحریک انصاف کے سیکرٹریٹ آنے کی دعوت دیتا ہوں۔

اس موقع پر پاکستان عوامی تحریک کی طرف سے عاقل ملک، ساجد محمود بھٹی، محمد حنیف مصطفوی، میاں زاہد جاوید اور عبد القادر جبکہ نور محمد، رانا محمد ندیم، حماد نیازی تحریک انصاف کی طرف سے موجود تھے۔ دونوں جماعتوں کے قائدین نے اس امر پر اتفاق کیا کہ جمہوریت اور موجودہ نظام انتخاب کے درمیان کوئی جوڑ نہیں۔ انتخابی اصلاحات کے بغیر تبدیلی کا خواب شرمندہ تعبیر نہیں ہو سکتا۔ بلدیاتی الیکشن کے حوالے سے دونوں جماعتوں میں اتفاق پایا گیا کہ اختیارات کی نچلی سطح تک تقسیم ہونی چاہیے اور صوبائی اور قومی اسمبلی کے اراکین کے صوابدیدی اور مالیاتی اختیارات ختم کر کے انہیں صرف قانون سازی تک محدود کیا جائے تا کہ عوام کے حقوق دلانے کیلئے قانون سازی کا عمل آگے بڑھے۔

ملاقات کے بعد صحافیوں کے سوالات کا جواب دیتے ہوئے پاکستان عوامی تحریک پنجاب کے صدر بشارت عزیز جسپال نے کہا کہ عوام کو ریلیف دینے کی بجائے ان سے جینے کا حق بھی چھینا جا رہا ہے، اوپر سے لوڈ شیدنگ نے جینا عذاب کر رکھا ہے۔ ایسا صرف اور صرف کرپٹ اور استحصالی نظام کی وجہ سے ہے۔ عوام کو جان لینا چاہیے کہ موجودہ ظالمانہ نظام کو موت دئیے بغیر انہیں نجات نہیں مل سکتی۔ بلدیاتی انتخابات سے قبل قوم کے سامنے ضلعی حکومتوں کا قابل عمل ماڈل پیش کیا جائے گا۔

تحریک انصاف پنجاب کے صدر اعجاز چودھری نے کہا کہ وقت آ گیا ہے کہ تبدیلی کی قوتیں تحفظات کو بالائے طاق رکھتے ہوئے ایک راستہ چن لیں۔ مستقبل میں تبدیلی کی تمام قوتوں کو اکٹھا ہونا ہو گا اس کے بغیر تبدیلی کا کوئی تصور نہیں ہے۔ موجودہ الیکشن میں جس سے جو غلطی ہوئی اس کو دہرانے کی بجائے اکٹھے مل کر نظام کے خلاف جدوجہد کی جائے۔ انہوں نے کہا کہ 3 ماہ کے اندر بلدیاتی الیکشن کا قابل عمل ماڈل قوم کے سامنے لائیں گے اور خیبر پختونخواہ میں نافذ کر کے پنجاب میں بھی اس ماڈل کے حوالے سے دباؤ ڈالیں گے۔

اس سے متعلقہ فوٹو البم ملاحظہ کرنے کے لئے کلک کریں۔

تبصرہ

تلاش

ویڈیو

Ijazat Chains of Authority
Admissions Open Minhaj University Lahore
We Want to CHANGE the Worst System of Pakistan
Presentation MQI websites
Advertise Here
Top