پندرہ روزہ عرفان القرآن کورس کی اختتامی تقریب

منہاج القرآن ویمن لیگ کے زیراہتمام پندرہ روزہ عرفان القرآن کورس کی اختتامی تقریب مورخہ 6 جولائی 2008ء بروز اتوار قصر ذوق بینکوئیٹ ہال گلبرگ لاہور میں انعقاد پذیر ہوئی جس میں مجدد عصر شیخ الاسلام ڈاکٹر محمد طاہرالقادری نے خصوصی شرکت کی۔ اس کے علاوہ محترمہ غزالہ حسن قادری، محترمہ فزا حسین قادری اور محترمہ خدیجہ قرۃ العین قادری نے بھی خصوصی شرکت کی۔ جبکہ مرکزی قائدین میں سے ناظم اعلیٰ ڈاکٹر رحیق احمد عباسی، نائب ناظم اعلیٰ شیخ زاہد فیاض، ناظم امورخارجہ جی ایم ملک، ناظم دعوت رانا محمد ادریس قادری، ڈائریکٹر فرید ملت ریسرچ انسٹی ٹیوٹ ڈاکٹر علی اکبر الازہری، دیگر مرکزی قائدین اور اساتذہ کرام نے شرکت کی۔

پروگرام کا آغاز تلاوت قرآن مجید اور نعت رسول مقبول صلی اللہ علیہ وآلہ وسلم سے ہوا۔ بعد از تلاوت و نعت کیمپ میں کامیاب ہونے والی معلمات کو شیخ الاسلام کے دست مبارک سے اسناد دی گئیں علاوہ ازیں کیمپ کی انتظامیہ اور اساتذہ کرام جنہوں نے اس کورس کو کامیاب بنانے میں بھرپور کردار ادا کیا انہیں شیلڈز دی گئیں۔ کیمپ آرگنائزر محترمہ صبا فاطمہ مشہدی اور انکی پوری ٹیم کو شیخ الاسلام نے اتنے خوبصورت کورس کے انعقاد پر خصوصی مبارکباد پیش کی۔

شیخ الاسلام ڈاکٹر محمد طاہرالقادری نے معلمات سے خطاب کیا۔ جس میں آپ نے "اسم، فعل اور حرف" کے باہمی تعلق و نسبت کو روحانی و تصوفانہ زبان میں واضح کیا۔ آپ نے فرمایا فعل کی کوئی حیثیت نہیں ہوتی جب تک کہ وہ کسی اسم کے ساتھ جڑ نہیں جاتا اور جو اسم جتنا اعلیٰ ہو گا اس کا فعل بھی اسکی نسبت کے صدقے اتنا ہی اعلیٰ ہو جاتا ہے۔ اسی طرح آپ نے حرف کے بارے میں بتایا کہ اس اکیلے کی کوئی حیثیت نہیں ہے لیکن جب یہ کسی کے ساتھ مل جاتا ہے، جڑ جاتا ہے، لگ جاتا ہے تو اس کا بھی وجود واضح ہو جاتا ہے، اس کی بھی حیثیت ہو جاتی ہے۔

آپ نے "بسم اللہ" کی مثال دے کر فرمایا کہ اللہ نے اپنے اسم کو بھی وسیلہ بنا کر فرمایا! کہ "اے لوگو اگر تم نے مجھ تک پہنچنا ہے تو پہلے میرے اسم کا وسیلہ اختیار کرو ہر کام میں برکت ہو جائے گی"۔ اس طر ح "ب" کے اسم کے ساتھ لگنے سے اس کو معنی مل گیا، اسکو پہچان مل گئی اسی طرح جو اللہ کی پاک ہستیوں کے ساتھ لگ جاتے ہیں تو ہم جیسے بے قیمت لوگوں کو بھی پہچان مل جاتی ہے۔ آخر میں شیخ الاسلام ڈاکٹر محمد طاہر القادری مدظلہ العالی نے تمام شرکائے کورس، انتظامیہ، اساتذہ اور کامیاب معلمات کیلئے خصوصی دعا فرمائی۔

تبصرہ

تلاش

ویڈیو

Minhaj TV
Quran Reading Pen
Presentation MQI websites
Advertise Here
Top