مرکزی سیکرٹریٹ پر معراج النبی ﷺ و ماہانہ مجلس ختم الصلوٰۃ علی النبی ﷺ کانفرنس کا انعقاد

صدر منہاج القرآن انٹرنیشل ڈاکٹر حسین محی الدین قادری نے 28 فروری 2022ء کو مرکزی سیکرٹریٹ میں منعقدہ ’’معراج النبی ﷺ کانفرنس و ماہانہ مجلس ختم الصلوٰۃ علی النبی ﷺ‘‘ سے خطاب کرتے ہوئے کہا کہ معراج النبی آقا کریم ﷺ کے چند عظیم ترین معجزات میں سے سب سے عظیم معجزہ ہے، ایسا معجزہ آپ سے قبل کسی اور نبی، رسول اور پیغمبر کو عطاء نہیں کیا گیا جو اللہ تعالیٰ نے تاجدار کائنات ﷺ کو عطاء کیا۔ جب تک اہلیان اسلام آقا علیہ الصلوۃ والسلام سے بے حد و حساب محبت کرتے تھے تو اہلیان اسلام کو اللہ پاک بھی بے حد و حساب دیتا تھا جب انہوں نے حضور سے محبت ناپ تول کے کرنا شروع کردی اللہ پاک نے عظمتیں، رفعتیں اور عزتیں بھی ناپ تول کے دینا شروع کردی۔ اللہ پاک آقا علیہ الصلوۃ و السلام سے ہمیں بے حد و حساب محبت کرنے کی توفیق عطاء فرمائے اور حضور ﷺ کی غلامی میں جینے مرنے کی توفیق عطاء فرمائے۔

کانفرنس میں علماء، مشائخ، قرآء، نعت خواں، مذہبی رہنماؤں، منہاج القرآن علماء کونسل کے قائدین، تحریک منہاج القرآن کے عہدیداران، کارکنان اور مختلف شعبہ ہائے زندگی سے تعلق رکھنے والے خواتین و حضرات کی بڑی تعداد موجود تھی۔