پروفیسر ڈاکٹر حسین محی الدین قادری کی تربیت نعت کورس کی اختتامی تقریب میں شرکت و گفتگو
پروفیسر ڈاکٹر حسین محی الدین قادری ڈپٹی چیئرمین بورڈ آف گورنرز منہاج یونیورسٹی لاہور کی تربیت نعت کورس کی اختتامی تقریب میں شرکت و گفتگو
حسان بن ثابت سنٹر فار ریسرچ ان نعت لٹریچر منہاج یونیورسٹی لاہور کے زیراہتمام ’’تربیت نعت کورس‘‘ مکمل کرنے والے طلباء و طالبات کے اعزاز میں تقریب تقسیم اسناد کا انعقاد کیا گیا۔ تقریب میں ڈپٹی چیئرمین بورڈ آف گورنرز منہاج یونیورسٹی لاہور پروفیسر ڈاکٹر حسین محی الدین قادری نے بطور مہمان خصوصی شرکت اور خطاب کیا۔
اس موقع پر گفتگو کرتے ہوئے انہوں نے تربیت نعت کورس مکمل کرنے والے طلباء و طالبات کو مبارکباد دیتے ہوئے کہا کہ حضور اکرم محمد مصطفیٰ ﷺ کی شان میں نعت گوئی اور نعت خوانی ایک عظیم سعادت ہے۔ خود اللہ تعالیٰ نے اپنے حبیب ﷺ کی مدح سرائی بڑے اہتمام کے ساتھ فرمائی اور سارا قرآن پاک حضور اکرم ﷺ کی مدحت و توصیف بیان کرتا ہے۔ انہوں نے تربیت نعت کورس کی کامیاب تکمیل پر ڈائریکٹر حسان بن ثابت سنٹر فار ریسرچ ان نعت لٹریچر منہاج یونیورسٹی لاہور ڈاکٹر سرور حسین نقشبندی اور ڈپٹی ڈائریکٹر راشد کلامی کاوشوں سراہتے ہوئے مبارکباد دی۔
جسٹس (ر) میاں نذیر اختر نے پروگرام میں اظہار خیال کرتے ہوئے کہا کہ عشق مصطفیٰ ﷺ ہماری نجات کا ذریعہ ہے، منہاج یونیورسٹی لاہور میں حسان بن ثابت سنٹر فار ریسرچ ان نعت لٹریچر کے زیر سایہ تربیت نعت کورس کا آغاز نعت پڑھنے اور نعت سیکھنے والے طلباء و طالبات کے لیے کسی نعمت سے کم نہیں۔ انہوں نے کہا کہ تربیت نعت کورس کوئی عام کورس نہیں بلکہ اس میں شرکت اس حقیقت کی مظہر ہے کہ اس میں حصہ لینے والے تمام طلبہ کے دلوں میں چراغ عشق مصطفیٰ ﷺ روشن ہے اور یہ ایک بڑا اعزاز ہے۔ انہوں نے مزید کہا کہ بلاشبہ محبت مصطفیٰ ﷺ ہی ہمارا اصل اثاثہ دین اور حیات کا قیمتی سرمایہ ہے۔
تقریب میں رجسٹرار منہاج یونیورسٹی ڈاکٹر خرم شہزاد، نوراللہ صدیقی، توفیق احمد توفیق، محمد افضل نوشاہی، ڈاکٹر عظمیٰ زریں نازیہ، محمد فاروق رانا، میاں زاہد اسلام، میچلڈ گیہا سمیت منہاج یونیورسٹی لاہور کے اساتذہ اور طلبہ کی کثیر تعداد نے شرکت کی۔
تقریب کے اختتام پر پروفیسر ڈاکٹر حسین محی الدین قادری نے تربیت نعت کورس (تحریری امتحان) میں نمایاں پوزیشن ہولڈرز اور کورس میں حصہ لینے والے طلباء و طالبات میں شیلڈز اور اسناد تقسیم کیں۔
تبصرہ