فاؤنڈنگ ممبرز ڈے: احمد نواز انجم کا اخلاص، استقامت اور دینی وابستگی پر زور

تحریک منہاج القرآن کے سینئر ممبر احمد نواز انجم نے کونسل آف فاؤنڈنگ اینڈ سینئر ممبرز منہاج القرآن انٹرنیشنل کے زیرِاہتمام فاؤنڈنگ ممبرز ڈے کے موقع پر منعقدہ خصوصی تقریب سے اظہارِ خیال کرتے ہوئے کہا کہ اللہ تعالیٰ کا بے حد شکر ہے کہ اُس نے ہمیں اپنے پیارے نبی حضرت محمد ﷺ کی محبت اور اُن پر درود و سلام بھیجنے کی سعادت عطا فرمائی۔ انہوں نے دعا کی کہ اللہ تعالیٰ ہمیں دین کے تقاضے پورے کرنے اور اس کی خدمت کا حق ادا کرنے کی توفیق عطا فرمائے۔

انہوں نے کہا کہ ان کا تحریک سے تعلق 1983ء سے قائم ہے، جب اُن کی عمر تقریباً 24 سال تھی۔ انہوں نے بتایا کہ وہ سلسلہ نقشبندیہ سے بھی وابستہ رہے اور زمانۂ طالب علمی میں دینی علوم کے حصول کا شرف حاصل کیا۔ ایک حدیثِ مبارکہ کا مطالعہ کرنے کے بعد اُن کے ذہن میں یہ سوال پیدا ہوا کہ ہر صدی میں دین کی تجدید کرنے والے مجدد کی نشاندہی کیسے کی جائے اور اُس کی پیروی کیسے اختیار کی جائے۔

احمد نواز انجم نے کہا کہ اس سوال کا جواب تلاش کرنے کے لیے انہوں نے مختلف علماء اور اہلِ علم سے رابطہ کیا، مگر انہیں مکمل اطمینان حاصل نہ ہو سکا۔ بعد ازاں قرآن و سنت کی روشنی میں غور و فکر کے نتیجے میں اللہ تعالیٰ نے اُن پر راستہ واضح کر دیا اور انہیں ایک ایسے مشن سے وابستگی نصیب ہوئی جسے انہوں نے اپنی زندگی کا مقصد بنا لیا۔

انہوں نے حضرت حذیفہ رضی اللہ عنہ کی روایت کردہ حدیثِ مبارکہ کا حوالہ دیتے ہوئے کہا کہ حضور نبی اکرم ﷺ نے آنے والے زمانوں کے حالات بیان کرتے ہوئے ہدایت فرمائی کہ اگر کسی دور میں ایمان کے تحفظ اور دین کی خدمت کرنے والی کوئی جماعت موجود ہو تو اُس کے ساتھ شامل ہو جانا ہی ایمان کی حفاظت کا ذریعہ ہے۔

انہوں نے کہا کہ اللہ تعالیٰ نے ہمیں ایک عظیم مشن سے وابستہ کر کے بے پناہ سعادت عطا فرمائی ہے، اور اس راستے میں کامیابی کے لیے دو بنیادی اوصاف نہایت ضروری ہیں: اخلاص اور محنت۔ انہوں نے کہا کہ ہر عمل خالصتاً اللہ کی رضا کے لیے ہونا چاہیے اور مشن کی دعوت کو آگے بڑھانے کے لیے مسلسل اور منظم محنت کرنا ہوگی۔

آخر میں انہوں نے دعا کی کہ اللہ تعالیٰ ہمیں اخلاص اور استقامت کے ساتھ دین کی خدمت کرنے کی توفیق عطا فرمائے اور ہماری باقی ماندہ زندگی بھی اسی عظیم مشن کے لیے وقف رہے۔ آمین۔