ہماری JIT عوام اور میڈیا ہیں جنہوں نے 12 گھنٹے تک براہ راست قتل عام دیکھا، ڈاکٹر طاہرالقادری کی وطن واپسی پر پریس کانفرنس

مورخہ: 29 جون 2015ء

Dr Tahir-ul-Qadri’s arrives in Pakistan to a warm welcome

لاہور (29 جون 2015) پاکستان عوامی تحریک کے سربراہ ڈاکٹر طاہرالقادری نے لندن سے لاہور پہنچنے پر اپنی رہائش گاہ پر پرہجوم پریس کانفرنس سے خطاب کرتے ہوئے کہا کہ سانحہ ماڈل ٹاؤن کے قتل عام کا منصوبہ اسلام آباد میں بنا۔ نواز شریف اور شہباز شریف اس کے منصوبہ ساز ہیں۔ تختہ دار تک پہنچائے بغیر ان کا پیچھا نہیں چھوڑیں گے۔ کراچی کو دہشتگردی سے پاک کرنے والے رینجرز، افواج پاکستان کے سپہ سالاروں اور سکیورٹی کے ذمہ دار اداروں سے کہتا ہوں کہ لاہور میں بھی 14 لاشیں پڑی ہیں جو انصاف کی منتظر ہیں۔ قاتلوں کی بنائی جے آئی ٹی کی رپورٹ کو قوم نے بھی مسترد کر دیا۔ ہماری جے آئی ٹی عوام اور میڈیا ہیں جنہوں نے 12 گھنٹے تک براہ راست قتل عام دیکھا۔ حکمرانوں کے اثرو رسوخ سے پاک جے آئی ٹی میں ضرور شریک ہونگے۔ یہ تو ثابت ہو چکا کہ قتل عام پولیس نے کیا تاہم جے آئی ٹی نے صرف اس بات کا تعین کرنا ہے کہ قتل عام کا حکم کس نے دیا؟ عمران خان سے ملاقات کا کوئی شیڈول نہیں ہے تاہم ان سے ملاقات میں حرج کیا ہے۔ چودھری برادران سے کوئی اختلاف نہیں۔ معاہدے کرنے والوں کے ضمیر مردہ اور زبانیں گنگ ہو جاتی ہیں ہم تو ظالم اور سفاک حکمرانوں کو للکار رہے ہیں انہیں بے نقاب کررہے ہیں۔ کسی کے پاس ڈیل کے ثبوت ہیں تو سامنے لائے۔ بے ضمیر حکمرانوں میں اتنی جرات نہیں کہ ہمارا سامنا کر سکیں۔ ڈاکٹر طاہرالقادری اپنی رہائش گاہ کے باہر ڈاکٹر حسن محی الدین، ڈاکٹر رحیق عباسی، خرم نواز گنڈاپور، عامر فرید کوریجہ، بریگیڈیئر(ر) مشتاق احمد، بشارت جسپال، فیاض وڑائچ سمیت سینئر رہنماؤں کے ہمراہ پریس کانفرنس سے خطاب کر رہے تھے۔

لندن سے لاہور پہنچنے پر ہزاروں کارکنوں نے لاہور علامہ اقبال انٹرنیشنل ایئرپورٹ پر ان کا شاندار استقبال کیا۔ ڈاکٹر طاہرالقادری گاڑیوں، موٹر سائیکلیوں کے قافلے میں 4 گھنٹے میں ایئرپورٹ سے اپنی رہائش گاہ پہنچے، یوتھ ونگ کے سینکڑوں کارکنان حفاظتی دستے کے طور پر ان کی گاڑی کے ساتھ ساتھ چلتے رہے۔ تمام راستہ خیر مقدمی بینروں سے سجایا گیا۔ کارکن پارٹی ترانوں پر رقص کر کے اپنے قائد کی آمد پر خوشی کا اظہار کرتے رہے۔ صبح 6بجے سے لیکر 8 بجے تک لاہور ایئرپورٹ گونواز گو کے نعروں سے گونجتا رہا۔ ویمن لیگ کی خواتین کارکنان نے بڑی تعداد میں ڈاکٹر طاہرالقادری کا استقبال کیا اور رہائش گاہ پہنچنے پر سینکڑوں بچیوں نے پھول کی پتیاں نچھاور کر کے ان کا استقبال کیا اور ویلکم ویلکم کا ترانہ گا کر ان کی آمد پر خوشی کا اظہار کیا۔

Dr Tahir-ul-Qadri’s arrives in Pakistan to a warm welcome

ڈاکٹر طاہرالقادری نے کہا کہ کراچی میں 15 سو افراد موت کے منہ میں چلے گئے صوبائی حکومت کہتی ہے کہ وفاقی حکومت ذمہ دار ہے، وفاقی حکومت کہتی ہے صوبائی حکومت ذمہ دار ہے حالانکہ یہ دونوں حکومتیں ان اموات کی ذمہ دار ہیں کراچی کے عوام پانی اور بجلی نہ ملنے کے باعث مررہے ہیں۔ ایسے نااہل حکمرانوں کو اب تک استعفیٰ دے دینا چاہیے تھا ملک میں جمہوریت نہیں ہے۔ چند لٹیرے ملک کو لوٹ رہے ہیں اور انہوں نے 19 کروڑ عوام کو یرغمال بنا رکھا ہے۔ ان ظالموں سے اس دن جان چھوٹے گی جب قوم باہر نکلے گی۔ انہوں نے کہا کہ عوام کے حقوق کی محافظ پارلیمنٹ اور سینیٹ ناکام ہو چکی ہے۔ دھرنے کے دوران کئی کئی دن تک پارلیمنٹ کے مشترکہ اجلاس منعقد کر کے ہمیں خانہ بدوش کہا گیا۔ آج اسی پارلیمنٹ اور سینیٹ نے ملکر 15 سو اموات پر اجلاس بلا کر اس پر غور کیوں نہیں کیا؟

انہوں نے کہا کہ قارون کا خزانہ رکھنے والے قاتل حکمرانوں کی آئندہ نسلیں بھی ہمارے غریب شہید کارکنوں کی قیمت نہیں لگا سکتیں۔ ہمارے غریب کارکنوں نے حکمرانوں کی کروڑوں کی پیشکش ٹھکرا کر ثابت کر دیا کہ وہ غریب ضرور ہیں مگر بے ضمیر نہیں۔ مجھے اپنے ان کارکنوں پر فخر ہے۔ انہوں نے شدید گرمی اور روزے کی حالت میں استقبال کیلئے آنے والے کارکنوں کا شکریہ ادا کیا اور کہا کہ کارکنوں کے جوش و خروش نے میری سفری تھکن اتار دی۔

ڈاکٹر طاہرالقادری نے کہا کہ سانحہ ماڈل ٹاؤن میں بہنے والے خون کا حساب ہو کر رہے گا۔ دنیا میں کہیں ایسا نہیں ہوتا کہ قتل کرنے والے ہی تفتیش کریں مگر بدقسمتی سے یہاں قاتل خود منصف بن جاتے ہیں اور غریب شہریوں کو انصاف سے محروم کر دیتے ہیں۔ انہوں نے کہا کہ نواز شریف، شہباز شریف سن لو تم ہمارے بے گناہ کارکنوں کے قاتل ہو تمہیں تختہ دار تک پہنچا کر دم لینگے۔ شہباز شریف نے خود جوڈیشل کمیشن بنایا اور پھر جب رپورٹ حق میں نہ آئی تو اس کی رپورٹ کو تسلیم کرنے سے انکار کیا بلکہ کمیشن کو غیر قانونی دلوانے کی کوششیں شروع کر دیں۔ پولیس حکمرانون کی خواہش پر قتل عام کرتی ہے، اس لیے حکمران پولیس کے جرائم اور پولیس حکمرانوں کے جرائم پر پردہ ڈالتی ہے۔ جس ملک میں ریاست قتل و غارت گری کروائے وہاں غریب کو انصاف نہیں مل سکتا۔ کراچی کو دہشتگردوں سے پاک کرنے والے بتائیں پنجاب میں آپریشن کب شروع ہو گا؟ یہاں بھی بے گناہ خون بہہ رہا ہے اور ظلم اپنی انتہاؤں کو چھورہا ہے۔ انہوں نے کہا کہ پولیس کو قتل عام کا لائسنس ملا ہوا ہے۔ ملکی ادارے حکومتی مظالم پر خاموش ہیں پتہ نہیں ان کو سانپ کیوں سونگھ گیا ہے؟ اس وقت ملک میں انصاف ملتا نہیں بلکہ بکتا ہے۔ سانحہ ماڈل ٹاؤن کی قتل و غارت گری میں ملوث پولیس کو سزا مل جاتی تو سانحہ ڈسکہ نہ ہوتا جہاں دو وکلاء کو سینے میں گولیاں مار کر شہید کر دیا گیا، روالپنڈی میں خون نہ بہتا۔

انہوں نے کہا کہ میں ڈر رہا ہوں کہ کرپٹ اور لٹیرے حکمران عوام کو اس نہج پر نہ لے جائیں جہاں وہ پاکستان کے جائز ہونے یا نہ ہونے کی بحث کرنے لگیں، جب غریب سے انصاف، روزگار، تعلیم، صحت سمیت بنیادی سہولتیں چھین لی جاتی ہیں تو وہاں مایوسی اور ردعمل جنم لیتا ہے۔

PAT Chief Dr. Tahir-ul-Qadri arrives in PakistanRead More: http://www.pat.com.pk/english/tid/33501/PAT-Chief-Dr-Tahir-ul-Qadri-arrives-in-Pakistan.html

Posted by Pakistan Awami Tehreek (PAT) on Monday, June 29, 2015

Dr Tahir-ul-Qadri’s arrives in Pakistan to a warm welcome

Dr Tahir-ul-Qadri’s arrives in Pakistan to a warm welcome

تبصرہ

تلاش

ویڈیو

Ijazat Chains of Authority
Top