اسلام انسانیت کا محافظ دین ہے: خرم نواز گنڈاپور

قرآن نے انسانیت کی بقاء اور حفاظت کے لیے رہنما اصول دئیے ہیں
کانفرنس سے خانہ فرہنگ ایران پشاور کے ڈی جی، ام حبیبہ و عبدالحئی علوی کا خطاب

لاہور (3 ستمبر2019) تحریک منہاج القرآن کے ناظم اعلیٰ خرم نواز گنڈاپور نے ”اسلام انسانیت کا محافظ“کانفرنس سے خطاب کرتے ہوئے کہا کہ قرآن کلام اللہ ہے، اس کے اندر ترقی، خوشحالی، بقاء کے رہنما اصول دئیے گئے ہیں، جو قوم بھی ان اصولوں کو اختیار کرے گی وہ دنیا میں ترقی کرے گی تاہم آخرت اہل ایمان کی ہے، قرآنی تعلیمات سے دوری کی وجہ سے امت مسلمہ زوال کا شکار ہے۔ انہوں نے کانفرنس سے خطاب میں کہا کہ منہاج القرآن، قرآن کے راستے پر ہے، شیخ الاسلام ڈاکٹر محمد طاہرالقادری کی یہ کوشش اور خواہش ہے کہ امت مسلمہ کا ہر فرد خواہ وہ عربی ہے یا غیر عربی وہ اللہ کے کلام کو براہ راست سمجھے اور اس پر تدبر کرے۔

کانفرنس کا اہتمام منہاج القرآن ویمن لیگ خیبرپختونخوا کی طرف سے کیا گیا اور عرفان القرآن کورس کے سلسلہ میں 10 روزہ ڈپلومہ ان قرآن سٹڈی میں حصہ لینے والے کامیاب شرکاء کو سرٹیفکیٹس دئیے گئے۔

قونصل جنرل خانہ فرہنگ ایران پشاور محمد باقر بیگی نے خطاب کرتے ہوئے کہا کہ قرآن نے انسانیت کی بقاء اور تحفظ کے لیے بڑی ٹھوس فکری بنیادیں مہیا کی ہیں، اسلام کسی بے گناہ کی جان لینے کا درس نہیں دیت، اسلام ایک پرامن ضابطہ حیات ہے، قرآن مظلوم کی مدد کا حکم دیتا ہے اور مرد و خواتین کو حصول علم کے حوالے سے پابندبناتا ہے۔ انہوں نے منہاج القرآن اور شیخ الاسلام ڈاکٹر محمد طاہرالقادری کی قرآنی علوم کے فروغ اور انسانیت کے لیے بے مثال خدمت انجام دینے کی تعریف کی۔

منہاج القرآن ویمن لیگ خیبرپختونخوا کی کوآرڈینیٹر ام حبیبہ نے خطاب کرتے ہوئے کہا کہ اسلام کے تعلیم و تربیت والے پیغام کو تحریک منہاج القرآن نے اپنا مرکز و محور بنایا ہے، قائد تحریک منہاج القرآن شیخ الاسلام ڈاکٹر محمد طاہرالقادری نے خواتین کی دینی اور دنیاوی تعلیم کے لیے عالمی معیار کے سکول، کالج بنائے ہیں، جہاں خواتین بامقصد تعلیم حاصل کررہی ہیں۔ انہوں نے کہا کہ الحمدللہ کے پی کے میں کامیاب قرآن لرننگ کے کورسز منعقد ہورہے ہیں اور ان کورسز سے خواتین سمیت زندگی کے ہر شعبے سے تعلق رکھنے والے افراد مستفید ہورہے ہیں۔

کانفرنس سے خالد محمود درانی، محسن بھی خطاب کی، تاجر اتحاد پشاور کے رہنما خالد ایوب بھی شریک ہوئے، خرم نواز گنڈاپور نے ڈپلومہ ان قرآن سٹڈی کے لرننگ پروگرام کے کامیاب انعقاد پر نظامت تربیت کے ڈپٹی ڈائریکٹر محمود مسعود، علامہ سرفراز قادری اور ان کی پوری ٹیم کو مبارکباد دی۔ تقریب سے مرکزی ناظم تنظیمات برائے خیبرپختونخوا عبدالحئی علوی نے بھی خطاب کیا۔

تبصرہ

تلاش

ویڈیو

Minhaj TV
Quran Reading Pen
Presentation MQI websites
Advertise Here
Top