مرکزی اسلامک سنٹر لزبن، پرتگال میں سیرت النبی ﷺ و امنِ عالم کانفرنس سے شیخ الاسلام ڈاکٹر محمد طاہرالقادری کا خطاب
لزبن (پرتگال): شیخ الاسلام ڈاکٹر محمد طاہرالقادری دامت برکاتہم العالیہ نے مرکزی اسلامک سنٹر لزبن، پرتگال میں منعقدہ "سیرت النبی ﷺ و امنِ عالم کانفرنس" سے خطاب کرتے ہوئے سیرت النبی ﷺ کو عالمی امن، رواداری اور فروغِ انسانیت کے لیے کامل اور جامع ضابطۂ حیات قرار دیا۔
کانفرنس میں چیئرمین سپریم کونسل ڈاکٹر حسن محی الدین قادری، صدر منہاج یورپین کونسل بلال اُپل، سرپرست منہاج القرآن پرتگال محمد صغیر، صدر منہاج القرآن پرتگال کاشف نذیر سمیت مختلف شعبہ ہائے زندگی سے تعلق رکھنے والی معروف شخصیات، دانشوروں اور کمیونٹی نمائندگان نے شرکت کی۔
کانفرنس سے خطاب کرتے ہوئے شیخ الاسلام ڈاکٹر محمد طاہرالقادری دامت برکاتہم العالیہ نے کہا کہ موجودہ حالات میں انتہا پسندی، عدم برداشت اور اخلاقی انحطاط جیسے سنگین مسائل کا واحد اور پائیدار حل تعلیماتِ نبوی ﷺ میں مضمر ہے۔ انہوں نے واضح کیا کہ حضور نبی اکرم ﷺ کی سیرتِ طیبہ نہ صرف مسلمانوں بلکہ پوری انسانیت کے لیے امن، عدل، محبت اور برداشت کا آفاقی پیغام رکھتی ہے۔ انہوں نے اس امر پر زور دیا کہ اگر ہم اپنی انفرادی اور اجتماعی زندگیوں میں سیرتِ مصطفیٰ ﷺ کو عملی طور پر نافذ کر لیں تو دنیا حقیقی معنوں میں امن و سلامتی کا گہوارہ بن سکتی ہے۔
شیخ الاسلام نے مزید فرمایا کہ انسان کی زندگی صرف مادی ترقی تک محدود نہیں بلکہ اس کی حقیقی کامیابی روحانی بالیدگی، اعلیٰ اخلاق اور انسانی اقدار کی پاسداری میں ہے، اور یہ تمام اوصاف ہمیں سیرتِ رسول اکرم ﷺ سے ہی حاصل ہوتے ہیں۔
کانفرنس میں جنرل سیکرٹری منہاج یورپین کونسل حسن بوستان، شاہد ملک، مرینہ شاہ سید، عامر صدیق، حافظ غلام دستگیر، اظہر محمود اعوان، قاری امجد محمود، قیصر زبیر نجیب، ڈاکٹر عرفان ظہور احمد، شمسہ نور، محمد ظل حسن، علامہ مفتی اعجاز ملک، شاہد مرسلین اور محسن لقمان سمیت مختلف کمیونٹیز کے نمائندگان نے شرکت کی۔ اس موقع پر بالخصوص سکھ کمیونٹی کے رہنماؤں اور مرکزی اسلامک سنٹر لزبن کے بورڈ آف ٹرسٹیز کے اراکین کی شرکت نے بین المذاہب ہم آہنگی اور باہمی رواداری کے فروغ کا عملی مظہر پیش کیا۔
تبصرہ