پروفیسر ڈاکٹر حسین محی الدین قادری کے لیے اٹلی کی جانب سے “Sign of Peace” کا بین الاقوامی اعزاز
پروفیسر ڈاکٹر حسین محی الدین قادری، صدر منہاج القرآن انٹرنیشنل و ڈپٹی چیئرمین بورڈ آف گورنرز، منہاج یونیورسٹی لاہور، کو اٹلی کے معروف ادارے The Chair of Peace – Assisi کی جانب سے بین الاقوامی اعزاز Sign of Peace دیا گیا ہے۔
یہ اعزاز ڈاکٹر حسین محی الدین قادری کو قیامِ اَمن کے لیے کی جانے والی ان کی بے مثال اور مسلسل کاوشوں کے اعتراف میں دیا گیا، جن کے ذریعے انہوں نے قومی و بین الاقوامی سطح پر امن، رواداری، بین المذاہب مکالمہ، سماجی ہم آہنگی اور انسانی احترام کے فروغ کے لیے مؤثر کردار ادا کیا۔
یہ بین الاقوامی اعزاز اس اَمر کا واضح اعتراف ہے کہ پروفیسر ڈاکٹر حسین محی الدین قادری کی قیامِ امن کے کیلئے بے مثال خدمات پاکستان سے بڑھ کر عالمی سطح پر بھی اَمن اور بین الثقافتی ہم آہنگی کے فروغ میں مؤثر اور قابلِ قدر سمجھی جا رہی ہیں۔ یورپ اور دنیا بھر میں امن اور تعلیمی تعاون کے فروغ کے حوالے سے ان کی کاوشوں کو بھرپور پذیرائی حاصل ہو رہی ہے۔
پروفیسر ڈاکٹر حسین محی الدین قادری کی قیادت میں منہاج یونیورسٹی لاہور نے تحقیق، عالمی تعاون، جدید تعلیم، بین المذاہب رواداری، تعلیمِ مذاہب اور بین الثقافتی روابط کے میدان میں نمایاں پیش رفت کی ہے۔ بالخصوص UNESCO Chair on Peace Education and Intercultural Dialogue کے قیام کے بعد یونیورسٹی عالمی علمی و فکری مکالمے کا ایک اہم مرکز بن کر ابھری ہے، جہاں نوجوان نسل میں برداشت، اعتدال، انسانی احترام اور پائیدار اَمن کے تصورات کو فروغ دینے کے لیے مسلسل علمی و تحقیقی سرگرمیاں جاری ہیں۔
پروفیسر ڈاکٹر حسین محی الدین قادری کا یہ وژن نمایاں طور پر سامنے آتا ہے کہ: “ہم میں سے ہر ایک امن کی علامت بن سکتا ہے۔”
ان کا مؤقف ہے کہ جدید دور کے عالمی چیلنجز کا مؤثر حل صرف علم، مکالمہ، باہمی احترام اور انسان دوستی کے ذریعے ہی ممکن ہے۔ ان کی قیادت میں جاری علمی و سماجی کاوشیں اسی سوچ کی عملی تعبیر سمجھی جا رہی ہیں۔
بین الاقوامی تنظیمات اور سفارتی حلقوں نے اس اعزاز کو نہ صرف ڈاکٹر حسین محی الدین قادری بلکہ پاکستان کے وقار کے لیے بھی ایک اہم عالمی اعزاز قرار دیا ہے۔
تبصرہ