معلمین اعتماد اور اعتقاد سے انسانیت کی تعلیم و تربیت کا فریضہ سر انجام دیں۔ علامہ رانا محمد ادریس

مورخہ: 28 مئی 2012ء

انسانیت کی خدمت اورتعلیم و تربیت انبیاء کا مشن ہے۔ علامہ غلام مرتضیٰ علوی
قرآن مسلمانوں کی فکری رہنمائی اور سنت مصطفی صلی اللہ علیہ وآلہ وسلم عملی رہنمائی کا بہترین ذریعہ ہے۔ علامہ محمد لطیف مدنی
معلمین تعلیم اور کردار کی طرف توجہ دیں تو معاشر ے پر اچھے اثرات مرتب ہو سکتے ہیں۔ علامہ محمد شریف کمالوی
تحریک منہاج القرآن کے زیر اہتمام ایک روزہ کورس "آئیں دین سیکھیں" سے مقررین کا اظہار خیال

تحریک منہاج القرآن(شعبہ تربیت) کے زیر اہتمام گزشتہ روز مرکزی سیکرٹریٹ میں ایک روزہ تربیتی کیمپ برائے معلمین منعقد ہوا جس میں پورے پاکستان سے سینکڑوں معلمین نے شرکت کی۔ تربیتی کیمپ سے ناظم تربیت تحریک منہاج القرآن علامہ غلام مرتضیٰ علوی نے خطاب کرتے ہوئے کہا کہ انسانیت کی خدمت اور تعلیم و تربیت انبیاء کا مشن ہے۔ انبیاء علیہم الاسلام کا مشن ہی انسانیت کیلئے رحمت ہے۔ انہوں نے اس موقع پر تحریک منہاج القرآن کے زیر اہتمام دین اسلام کی بنیادی ضروریات کو جاننے کیلئے پورے پاکستان میں ایک روزہ "آئیں دین سیکھیں" کورس اور ترجمۃ القرآن سیکھنے کیلئے تین ماہ پر مشتمل عرفان القرآن کورس کے اجراء کا اعلان کیا۔ انہوں نے کورسز کے بارے میں کہا کہ اس سے دین اسلام کے بارے میں بنیادی معلومات اور ترجمۃ القرآن کی صلاحیت طلبہ و طالبات میں پیدا ہو گی۔

تربیتی کیمپ سے نائب ناظم اعلیٰ تحریک منہاج القرآن علامہ رانا محمد ادریس نے اپنے خیالات کا اظہار کرتے ہوئے کہا کہ دین اسلام خیر خواہی کا دین ہے۔ جو افراد دین اسلام کی اشاعت اور فروغ کیلئے جد و جہد کر تے ہیں وہ حقیقت میں انسانیت کی فلاح و بہبود کا کام کر رہے ہیں۔ انہوں نے کہا کہ معلمین اعتماد اور اعتقاد سے انسانیت کی تعلیم و تربیت کو عام کرنے میں اپنا بھر پور کردار ادا کریں۔ انہوں نے کہا اللہ تعالیٰ سے ڈرنے والوں کو سیدھی راہ نصیب ہوتی ہے اورا عمال صالحہ اپنانے والوں کو اللہ تعالیٰ مغفرت سے نواز دیتے ہیں۔

معروف مذہبی سکالر علامہ محمد لطیف مدنی نے اپنے خیالات کا اظہار کرتے ہوئے کہا کہ معلمین کو اسلام کے بنیادی تصورات کو مسخ کرنے والوں کا محاسبہ تعلیم اور دلائل سے کرنا چاہیے۔ انہوں نے کہا تحریک منہاج القرآن ایسے سکالرز کی ٹیم تیار کر رہی ہے جو اسلام کے درست تصورات کو پھیلانے میں سرگرم عمل ہے۔ انہوں نے کہا قرآن مسلمانوں کی فکری رہنمائی اور سنت مصطفی صلی اللہ علیہ وآلہ وسلم عملی رہنمائی کا بہترین ذریعہ ہے۔ قرآن اور سنت کو جدا کرنے والے اسلام کو نقصان پہنچا رہے ہیں۔ انہوں نے کہا دین اسلام سے دوری کی وجہ سے ہم دنیا میں ذلیل و خوار ہو رہے ہیں۔

تربیتی کیمپ سے علامہ شریف کمالوی نے اپنے خیالات کا اظہار کرتے ہوئے کہا کہ تعلیم کو عام اور سستا کرنے سے ہی معاشرہ سنور سکتا ہے۔ انہوں نے کہا کہ قوم کے طلبہ و طالبات کی تربیت حکومت کی ذمہ داری ہے۔ تحریک منہاج القرآن اسلامی تعلیمات کو عام کرنے میں جو کردار ادا کر رہی ہے یہ موجودہ دور میں بہت بڑا جہاد ہے۔ انہوں نے کہا اگر معلمین تعلیم اور کردار کی طرف توجہ دیں تو معاشر ے پر اچھے اثرات مرتب ہو سکتے ہیں۔ تحریک منہاج القرآن(شعبہ تربیت) کے ناظم علامہ غلام مرتضی علوی نے پاکستان بھر سے آئے ہوئے سینکڑوں معلمین کا شکریہ ادا کیا اور "آئیں دین سیکھیں" کورس کا تعارف کروایا۔ آخر میں نمایاں کارکردگی پانے والے معلمین کو تحریک منہاج القرآن (شعبہ تربیت) کی طرف سے خصوصی اسناد دی گئیں۔ تربیتی کیمپ سے علامہ غلام ربانی تیمور اور علامہ محمد حسین آزاد نے بھی خطاب کیا۔

تبصرہ

تلاش

ویڈیو

Ijazat Chains of Authority
Top