ڈیجیٹل اخلاقیات کا فروغ وقت کی اہم ضرورت ہے: شیخ الاسلام ڈاکٹر محمد طاہرالقادری

نوجوان سوشل میڈیا کو علم، تحقیق اور مثبت مکالمہ کے لئے استعمال کریں
جھوٹ، نفرت اور فتنہ انگیزی کی بجائے حق اور امن کو فروغ دیا جائے
احترام اور برداشت سے ہی مثبت ڈیجیٹل کلچر فروغ پا سکتا ہے: منہاج یوتھ لیگ کے ذمہ داران سے گفتگو

لاہور (31 دسمبر 2025) تحریک منہاج القرآن کے بانی و سرپرست اعلیٰ شیخ الاسلام ڈاکٹر محمد طاہرالقادری نے سوشل میڈیا کی بڑھتی ہوئی اہمیت، اس کے اخلاقی تقاضوں پر گفتگو کرتے ہوئے کہا کہ سوشل میڈیا ایک طاقتور ذریعہ اظہار ہے جو خیر و شر دونوں کے فروغ کا سبب بن سکتا ہےاس لئے اس کا استعمال اعلیٰ اخلاقی اقدار، سچائی اور ذمہ داری کے ساتھ ہونا چاہئے۔ وہ گزشتہ روز منہاج یوتھ لیگ کے ذمہ داران سے گفتگو کر رہے تھے۔ شیخ الاسلام ڈاکٹر محمد طاہر القادری نے کہاکہ موجودہ دور میں سوشل میڈیا رائے عامہ کی تشکیل، تعلیم، دعوت اور اصلاح معاشرہ کا موثر ذریعہ بن چکا ہے، اگر اسے مثبت اورتعمیری مقاصد کےلئے استعمال کیا جائے تویہ علم، شعور اورامن کے فروغ میں کلیدی کردار ادا کر سکتا ہےجب کہ غیر ذمہ دارانہ اور غیر اخلاقی استعمال معاشرتی بگاڑ، نفرت اور انتشار کو جنم دیتا ہے۔

شیخ الاسلام ڈاکٹر طاہر القادری نے اس بات پر زور دیا کہ سوشل میڈیا صارفین کو خبر یا معلومات شیئر کرنے سے قبل اس کی تصدیق کرنی چاہئے کیونکہ چھوٹی خبروں اور منفی پراپیگنڈے سے نہ صرف افراد بلکہ پورا معاشرہ متاثر ہوتا ہے۔ انہوں نے کہاکہ دین اسلام ہمیں سچ بولنے، امانتداری اور دوسروں کی عزت و آبرو کے تحفظ کی تعلیم دیتا ہے اور یہی اصول سوشل میڈیا کے استعمال پر بھی لاگو ہوتے ہیں۔ شیخ الاسلام ڈاکٹر طاہرالقادری نے نوجوانوں کو مخاطب کرتے ہوئے کہا کہ وہ سوشل میڈیا کو وقت کے ضیاع، کردار کشی اور بے مقصد بحث مباحثے کی بجائے علم، تحقیق، کردار سازی اور مثبت مکالمے کے لئے استعمال کریں۔

انہوں نے کہاکہ ڈیجیٹل اخلاقیات کا فروغ وقت کی اہم ترین ضرورت ہے۔ انہوں نے مزید کہا کہ سوشل میڈیا پر شائستگی، برداشت اور احترام کو فروغ دینا ہی ایک مہذب اور پر امن معاشرے کی بنیاد ہے۔ اختلاف رائے کو شائستہ انداز میں پیش کرنا اور نفرت انگیز رویوں سے اجتناب کرنا ہر فر دکی اخلاقی ذمہ داری ہے۔