حکومت یکم جنوری سے بجلی کے نرخوں میں اضافہ کا فیصلہ واپس لے : شیخ زاہد فیاض

حکومت عوام کو دکھوں اور مایوسیوں کے سوا کچھ نہیں دے رہی
بجلی کے نرخوں میں اضافہ بے یقینی اور بدحالی میں اضافہ کرنے کے مترادف ہے
شیخ زاہد فیاض چیف آرگنائزر پاکستان عوامی تحریک کی پریس بریفنگ

شیخ زاہد فیاض چیف آرگنائزر پاکستان عوامی تحریک نے کہا ہے کہ حکومت کی جانب سے یکم جنوری سے بجلی کے نرخوں میں اضافہ کا اعلان افسوس ناک امر ہے۔ اس سے عوام کے معاشی بوجھ اور دکھوں میں اضافہ ہو گا۔ پاکستان عوامی تحریک حکومت سے مطالبہ کرتی ہے کہ مہنگائی، لوڈ شیڈنگ میں پسی ہوئی اور دہشتگردی سے خوف و ہراس میں مبتلا قوم پر مزید ظلم و ستم نہ ڈھائے اور یکم جنوری سے بجلی کے نرخوں میں اضافہ کے فیصلہ کو واپس لیا جائے۔ پاکستان عوامی تحریک حکومت کے اس فیصلہ کو مسترد کرتی ہے۔ عوام کی بنیادی ضرورتوں کو پورا کرنے کا دعویٰ کرنے والی حکومت عوام کو دکھوں اور مایوسیوں کے سوا کچھ نہیں دے رہی۔ وفاقی وزیر پانی و بجلی پچھلے 2 سالوں سے یہ دعویٰ کرتے رہے ہیں کہ دسمبر 2009 میں لوڈ شیڈنگ ختم ہو جائے گی۔ عوام ان سے یہ مطالبہ کرتی ہے کہ ان کا یہ وعدہ کہاں گیا؟ اگر وہ قوم کو ریلیف نہیں دے سکتے تو ان پر ظلم کے پہاڑ بھی مت گرائے۔ ان باتوں کا اظہار انہوں نے تحریک کے مرکزی سیکرٹریٹ میں ایک پریس بریفنگ کے دوران گفتگو میں کیا۔ شیخ زاہد فیاض نے یہ بھی کہا کہ عوام کے لیے پہلے ہی بجلی کے نرخوں میں بہت زیادہ اضافہ ہو چکا تھا۔ گیس کی عدم دستیابی نے بھی عوام کو پریشان کر رکھا ہے۔ غربت اور بے روزگاری، بڑھتی ہوئی مہنگائی، بد امنی اور انتشار کی کیفیات کے ماحول میں بجلی کے نرخوں میں اضافہ بے یقینی اور بدحالی میں اضافہ کرنے کے مترادف ہے۔ انہوں نے کہا عوام کی ضروریات زندگی کی اشیاء میں قیمتوں کے نرخ برقرار رکھنے میں حکومت کی کارکردگی پہلے ہی ناقص ہے۔ انہوں نے یہ بھی کہا کہ عوام کے مسائل کا حل حکومت کی اولین ترجیح ہونی چاہیے۔ ایمان داری کے ساتھ عوامی مسائل کا تجزیہ کرے اور ان کے حل کے لیے فول پروف انتظامات کرے۔ پاکستان عوامی تحریک حکومت سے مطالبہ کرتی ہے کہ عوام کی معاشی حالت، بوجھ اور دکھوں کو کم کرنے کے لیے فوری لائحہ عمل تیار کرے اور سختی سے عملی اقدامات اٹھائے تاکہ عوام کو بنیادی ضروریات زندگی آسانی سے میسر آسکیں۔

تبصرہ

تلاش

ویڈیو

Minhaj TV
Quran Reading Pen
We Want to CHANGE the Worst System of Pakistan
Presentation MQI websites
Advertise Here
Top